Jón Ingi þátttakandi í nýju heimsmeti

Þann 6. nóvember 2024 var sett nýtt heimsmet í mynstur stökki (formation skydiving) og var einn meðlima Fallís, Jón Ingi Þorvaldsson, þátttakandi í því. Sett var heimsmet í svokölluðum Total-Break-Sequential flokki þar sem gerð eru fleiri en eitt aðskilin mynstur í sama stökki. Þátttakendur í stökkinu voru 151 talsins og er þetta í fyrsta sinn sem svo stór hópur gerir tvö algerlega aðskilin mynstur í sama stökki.

Stokkið var úr 18.250 feta hæð (5.560 metra hæð) yfir Skydive Arizona stökksvæðinu og úr samtals 7 flugvélum af gerðinni Skyvan og Twin-Otter. Þegar fyrra mynstrið hefur verið byggt er gefið merki, allir sleppa gripum og síðan er byggt nýtt mynstur áður en allir þurfa að tracka í burtu í 6.500 feta hæð.

Þetta er í fyrsta sinn sem Jón Ingi á þátt í heimsmeti í fallhlífarstökki en hann hefur áður tekið þátt í nokkrum landsmetum, m.a. áströlsku, egypsku og panamísku meti og fylkismetum í Bandaríkjunum í Illinois og Texas.

Þetta er hins vegar í þriðja sinn sem Íslendingur tekur þátt í heimsmeti í fallhlífarstökki. Fyrstur til þess var Nikolai "Nikki" Elíasson árið 1993 en þá tók hann þátt í 130 manna stökki sem þá var heimsmet. Síðan var það Ditta Valsdóttir sem tók þátt í 400 manna heimsmetinu sem sett var árið 2006 í Thailandi og stendur enn.

Meðfylgjandi er myndir af mynstrunum tveimur auk myndskeiða frá nokkrum sjónarhornum.